Da Lammas spates, lack flyooget aets
Abön a flakki laavin,
Fell frae da lift wi a heavy drift,
Da sarn as an hit'd been kaavin.

Da burns aa rase abön da braes
Fir stanks an stripes wir tömed in,
Till every lyoag whaar an eel could oag
A neesik micht a swömed in.

Da hedderkowes apo da knowes
Lay drooket an disjasket,
Da tatti shaas an bulwand taas
Wir wuppled laek a gasket.

Da grittest faels wir taen laek spaels
An hurled ta da ocean -
O, whaar could wirmi eels fin rest
Wi siccan a dire commotion.

An dis sam gref, da dead soo's bef,
Brook oot at da nedder nyook,
An ran lack a pipe till dey wir no a sipe
At could a covered a fluke.

And aa da eels cam, head-ower-heels,
Oot wi da force o watter -
A foon fan hadds among da clods,
An brugs an moory gutter.

An doon, doon, doon, grey, green, an broon,
Dey wirmed an dey wumbled,
Some smaa an lang laek a styilk o tang
An some laek a baa gyaan heddikraa
Till i da sea dey bumbled.